கடலூர் மாவட்டத்தில் பல்வேறு காவல் நிலையங்களில் பதிவான திருட்டு, களவு மற்றும் கொள்ளை வழக்குகளில், சம்பவ இடங்களில் சேகரிக்கப்பட்ட விரல்ரேகை தடயங்களை அறிவியல் பூர்வமாக ஆய்வு செய்து குற்றவாளிகளை அடையாளம் கண்டுபிடிப்பதில் சிறப்பாகப் பணியாற்றிய அறிவியல் தடயவியல் பிரிவைச் சேர்ந்த காவல் உதவி ஆய்வாளர்களுக்குக் கடலூர் மாவட்ட காவல் கண்காணிப்பாளர் பாராட்டுத் தெரிவித்தார்.
குற்றச் சம்பவங்கள் நடைபெற்ற இடங்களில் கிடைக்கும் விரல்ரேகை தடயங்களை முறையாகச் சேகரித்தல், அவற்றை அறிவியல் தொழில்நுட்பத்தின் உதவியுடன் ஆய்வு செய்தல் மற்றும் ஏற்கனவே பதிவுசெய்யப்பட்ட விரல்ரேகைகளுடன் ஒப்பிட்டுப் பார்த்து குற்றவாளிகளை அடையாளம் காணுதல் போன்ற பணிகளில் காவல் உதவி ஆய்வாளர்கள் திறம்படச் செயல்பட்டுள்ளனர். இவர்களின் துரிதமான மற்றும் துல்லியமான பணிகள், குற்ற வழக்குகளைக் கண்டறிவதற்கும், குற்றவாளிகளைச் சட்டத்தின் முன் நிறுத்துவதற்கும் பெரிதும் உதவியாக அமைந்துள்ளன.
காவல் துறையில் அறிவியல் தொழில்நுட்பத்தின் பயன்பாடு குற்றப் புலனாய்வில் முக்கியப் பங்கு வகிக்கும் நிலையில், விரல்ரேகை தடயங்களின் மூலம் குற்றவாளிகளைக் கண்டறிவதில் அர்ப்பணிப்புடனும் திறமையுடனும் பணியாற்றிய காவல் உதவி ஆய்வாளர்களின் சேவையைப் பாராட்டும் வகையில், மாவட்ட காவல் கண்காணிப்பாளர் திரு. விவேகானந்தா சுக்லா IPS அவர்கள் அவர்களுக்குப் பாராட்டுச் சான்றிதழ்களை வழங்கி கௌரவித்தார். மேலும், குற்றங்களைத் தடுப்பதிலும், குற்ற வழக்குகளை விரைந்து கண்டறிவதிலும் அறிவியல் தடயவியல் முறைகளைச் சிறப்பாகப் பயன்படுத்தி, பொதுமக்களின் பாதுகாப்பை உறுதி செய்யும் வகையில் தொடர்ந்து அர்ப்பணிப்புடன் பணியாற்ற வேண்டும் எனக் காவல் துறையினரை ஊக்குவித்தார்.
